Ko riehtiäššiolmooš totká kuoddâlmijd, te sun árvuštâl, et olášuveh-uv ton tábáhtusâst vuáđuvuoigâdvuođah já olmoošvuoigâdvuođah.
Suomâst laavah adeleh torvo ulmuid.

Teháliih laavah láá:

• aalmugliih vuáđuvuoigâdvuođah,
• Euroop union vuáđuvuoigâdvuođah já
• aalmugijkoskâsiih olmoošvuoigâdvuođah.

Jyehi ulmust láá vuáđuvuoigâdvuođah

Vuáđuvuoigâdvuođah uáivildeh vuoigâdvuođâid, moh láá mainâšum Suomâ vuáđudemlaavâst.
Toh láá vuáđuáárvuh já teháliih ääših puohháid.
Vuáđuvuoigâdvuođah torvejeh jyehi ulmuu rijjâvuođâ.
Staatâ, kieldah tâi virgeomâhááh iä uážu kuoskâđ taan rijjâvuotân.
Vuáđuvuoigâdvuođah tähideh ovdâmerkkân, et jyehi ulmust lii vuoigâdvuotâ eelliđ.

Puohâin lii vuoigâdvuotâ persovnlii rijjâvuotân já kuoskâmettumvuotân.
Puohâin lii rijjâvuotâ jotteeđ já vuoigâdvuotâ suojâliđ jieijâs persovnlii eellim.
Puohâin lii sänirijjâvuotâ, rijjâvuotâ čokkâniđ já kuullâđ ovtâstussáid.
Puohâin lii omâduv syeji.
Tot uáivild, et nuubij omâduv ij uážu väldiđ tâi tuššâdiđ.

Vuáđuvuoigâdvuođáid kuleh ruđâliih vuoigâdvuođah, sosialliih vuoigâdvuođah já čuovviittâsliih vuoigâdvuođah.
Tagareh láá ovdâmerkkân vuoigâdvuotâ paargon, sosialtoorvon já vuoigâdvuotâ finniđ máttááttâs.

Vuáđudemlaahâ syeijee

Ton lasseen vuáđudemlaahâ suoijâl täsiáárvu.
Vuáđudemlaahâ addel vuoigâdvuođâ uásálistiđ valjáid.
Vuáđudemlaahâ addel puoh Suomâ aalmugjesânáid vuoigâdvuođâ kevttiđ jieijâs kielâ.
Ton lasseen vuáđudemlaahâ suoijâl pirrâs.

Jyehi syemmiliist lii vuoigâdvuotâtorvo.
Tot uáivild, et laavah suojâleh sii vuoigâdvuođâid.

EU vuoigâdvuođah-uv kyeskih syemmilijd

Syemmilijd kyeskih meid Euroop union vuáđuvuoigâdvuođah.
Euroop unionist lii vuáđuvuoigâdvuotâkirje.
Toos láá čallum ulmui vuáđuvuoigâdvuođah.
Euroop union jeessânstaatah já toi virgeomâhááh kalgeh nuávdittiđ vuáđuvuoigâdvuođâid.

Olmoošvuoigâdvuođah kuleh puohháid

Olmoošvuoigâdvuođah láá čallum aalmugijkoskâsijd olmoošvuoigâdvuotâsopâmuššáid.
Suomâ staatâ lii lopedâm turviđ täid vuoigâdvuođâid jieijâs aalmugjesânáid já puoh ulmuid, kiäh láá Suomâst.
Olmoošvuoigâdvuođâi ulmen lii adeliđ puohháid olmoošáárvu miäldásii eellim.