Go vuoigatvuođaáššeolmmoš dutká guoddalemiid, son árvvoštallá, ollašuvvetgo dáhpáhusas vuođđovuoigatvuođat ja olmmošvuoigatvuođat.
Suomas lágat addet dorvvu olbmuide.

Dehálamos lágat leat:

• našuvnnalaš vuođđovuoigatvuođat,
• Eurohpa uniovnna vuođđovuoigatvuođat ja
• riikkaidgaskasaš olmmošvuoigatvuođat.

Juohke olbmos leat vuoigatvuođat

Vuođđovuoigatvuođat mearkkašit vuoigatvuođaid, mat leat namuhuvvon Suoma vuođđolágas.
Dat leat vuođđoárvvut ja dehálaš áššit buohkaide.
Vuođđovuoigatvuođat dorvvastit juohke olbmo friijavuođa.
Stáhta, gielddat dahje virgeoapmahaččat eai oaččo duohtadit dán friijavuhtii.
Vuođđovuoigatvuođat dáhkidit ovdamearkka dihtii, ahte juohke olbmos lea vuoigatvuohta eallit.
 
Buohkain lea vuoigatvuohta persovnnalaš friijavuhtii ja guoskameahttunvuhtii.
Buohkain lea friijavuohta johtit ja vuoigatvuohta suodjalit iežas priváhttaeallima.
Buohkain lea sátnefriijavuohta, friijavuohta čoahkkánit ja gullat servviide.
Buohkain lea opmodaga suodji.
Dat mearkkaša, ahte nuppi olbmo opmodaga ii oaččo váldit dahje duššadit.

Vuođđovuoigatvuođaide gullet ekonomalaš vuoigatvuođat, sosiála vuoigatvuođat ja čuvgehuslaš vuoigatvuođat.
Dat leat ovdamearkka dihtii vuoigatvuohta bargui, sosiáladorvui ja vuoigatvuohta oažžut oahpahusa.

Vuođđoláhka suddje

Dasa lassin vuođđoláhka suddje dásseárvvu.
Vuođđoláhka addá vuoigatvuođa oassálastit válggaide.
Vuođđoláhka addá Suoma buot riikkavuložiidda vuoigatvuođa geavahit iežaset giela.
Dasa lassin vuođđoláhka suodjala birrasa.

Juohke suopmelaččas lea vuoigatvuođadorvu.
Dat mearkkaša, ahte lágat suodjalit sin vuoigatvuođaid.

EU vuoigatvuođatge gusket suopmelaččaide

Suopmelaččaide gusket maiddái Eurohpa uniovnna vuođđovuoigatvuođat.
Eurohpa uniovnnas lea vuođđovuoigatvuođagirji.
Dasa leat čállojuvvon olbmuid vuođđovuoigatvuođat.
Eurohpa uniovnna lahttoriikkat ja daid virgeoapmahaččat fertejit čuovvut vuođđovuoigatvuođaid.

Olmmošvuoigatvuođat gullet buohkaide

Olmmošvuoigatvuođat leat čállojuvvon riikkaidgaskasaš olmmošvuoigatvuođasoahpamušaide.
Suoma stáhta lea lohpidan dorvvastit dáid vuoigatvuođaid riikkavuložiiddásis ja buot olbmuide, geat leat Suomas.
Olmmošvuoigatvuođaid ulbmil lea addit buohkaide olmmošárvvu mieldásaš eallima.