Ǥu vuõiggâdvuõttäʹššooumaž tuʹtǩǩad kueʹdlmid, son ärvvtââll, teâuddje-a šõddmõõžžâst vuâđđvuõiggâdvuõđ da ooumažvuõiggâdvuõđ.
Lääʹddjânnmest lääʹjj õuʹdde tuõrv oummuid.

Vääžnai lääʹjj liâ:

• meersaž vuâđđvuõiggâdvuõđ,
• Euroopp unioon vuâđđvuõiggâdvuõđ da
• meeraikõskksaž ooumažvuõiggâdvuõđ.

Juâkksest oummust liâ vuâđđvuõiggâdvuõđ

Vuâđđvuõiggâdvuõđ miârkte vuõiggâdvuõđid, kook liâ peäggtum Lääʹddjânnam vuâđđlääʹjjest.
Tõk liâ vuâđđäärv da vääžnai ääʹšš pukid.
Vuâđđvuõiggâdvuõđ tueʹrvve juõʹǩǩ oummu frijjvuõđ.
Riikk, kååʹdd leʹbe veʹrǧǧneeʹǩǩ jiâ vuäǯǯ kässjõõttâd tän frijjvuõʹtte.
Vuâđđvuõiggâdvuõđ täʹǩǩee ouddmiârkkân, što juõʹǩǩ oummust lij vuõiggâdvuõtt jieʹlled.

Pukin lij vuõiggâdvuõtt persoonlaž frijjvuõʹtte da kuõskteʹmesvuõʹtte.
Pukin lij frijjvuõtt liikkeed da vuõiggâdvuõtt suõjjled privattjieʹllmes.
Pukin lij sääʹnnfrijjvuõtt, frijjvuõtt noorõõttâd da kuullâd õhttõõzzid.
Pukin lij jeällmõõžž suõjj.
Tõt miârkat, što nuuʹbb jeällmõõžž ij vuäǯǯ viikkâd leʹbe hiâvted.

Vuâđđvuõiggâdvuõđid koʹlle ekonoomlaž vuõiggâdvuõđ, sosiaalʼlaž vuõiggâdvuõđ da čuõvtõsnallšem vuõiggâdvuõđ.
Tõk liâ ouddmiârkkân vuõiggâdvuõtt tuõjju, sosiaalstaaʹne da vuõiggâdvuõtt vuäǯǯad mättʼtõõzz.

Vuâđđlääʹǩǩ oudd suõj

Lââʹssen vuâđđlääʹǩǩ suõjjal tääʹssäärv.
Vuâđđlääʹǩǩ oudd vuõiggâdvuõđ vuässõõttâd vaalid.
Vuâđđlääʹǩǩ oudd pukid Lääʹddjânnam meerlaid vuõiggâdvuõđ ââʹnned jiijjâs ǩiõl.
Lââʹssen vuâđđlääʹǩǩ suõjjal pirrõõzz.

Juâkksest lääʹddoummust lij vuõiggâdvuõtt-tuõrvv.
Tõt miârkat, što lääʹjj suõjjle sij vuõiggâdvuõđeez.

EU vuõiggâdvuõđ še kueʹsǩǩe lääʹddoummuid

Lääʹddoummuid kueʹsǩǩe še Euroopp unioon vuâđđvuõiggâdvuõđ.
Euroopp unioonâst lij vuâđđvuõiggâdvuõttǩeʹrjj.
Tõõzz liâ ǩeeʹrjtum oummui vuâđđvuõiggâdvuõđ.
Euroopp unioon vuäzzlažjânnmi da tõi veʹrǧǧniiʹǩǩin lij päkk jääʹǩǩted vuâđđvuõiggâdvuõđid.

Ooumažvuõiggâdvuõđ koʹlle pukid

Ooumažvuõiggâdvuõđ liâ ǩeeʹrjtum meeraikõskksaž ooumažvuõiggâdvuõttsuåppmõõžžid.
Lääʹddjânnam riikk lij låʹppääm tuõrvvâd täid vuõiggâdvuõđid meerlaid da pukid oummuid, kook liâ Lääʹddjânnmest.
Ooumažvuõiggâdvuõđi miârktõs lij uʹvdded pukid ooumažäärv meâldlaž jieʹllem.