Riehtiäššiulmui kuoddâlem lii tohhum älkkeebin

Riehtiäššiulmui puáhtá tääl kuoddâliđ šleđgâhámásávt ain ovdiist torvolubbooht. Kuoddâleijee puáhtá uđđâ kuoddâlemluámáttuv peht vuolgâttiđ syeligâsâst toollâmnáál tiäđuid já nanosávt tubdâttâttâm tiileest finniđ meid čuávdus torvoviestáin jieijâs šleđgâpoostân taarbâšhánnáá sierâ tubdâttâttâđ riehtiäššiulmuu kansliast.

Uđâdem keežild šleđgâhámásiih kuoddâlemluámáttuvah láá sirdum torvoviestâpalvâlusân. Muulsâiähtun lii lasettum noonâ tubdâttâttâm, mii tuáimá Suomi.fi-tubdâttâttâm peht. Tánávt puáhtá visásmittiđ kuoddâleijee persovnlâšvuođâ tagarijn tilálâšvuođâin, main äššikirjeh siskeldeh syeligâsâst toollâmnáál tiäđuid. Uđâdem šiäštá koloid já luándu, ko pááppárkulâttem kiäppán merhâšitteht.

Šleđgâhámásii luámáttuv kevttee kuoddâleijee puáhtá kuoddâlem maŋa vuorkkiđ tâi printtiđ kuoddâlem olssis pdf-häämist. Luámáttuv ij taarbâš innig táttuđ sierâ riehtiäššiulmuu kansliast.

Uđâdem ohtâvuođâst párnááh já nuorah láá valdum huámášumán toin lain, et sijjân čuosâttum šleđgâhámásiih kuoddâlemluámáttuvah láá kavnâmist suomâkielân, ruotâkielân, puoh sämikieláid já eŋgâlâskielân.

Riehtiäššiulmui puáhtá ain-uv kuoddâliđ meid reiváin, šleđgâpostáin tâi tooimâtmáin kuoddâlem persovnlávt riehtiäššiulmuu kanslian.

Tubdâttâttâm ohtâvuođâst olesahasijd ulmuid, kiäh iä vala keevti Suomi.fi-viestâid, itá uáinusân avžuuttâs väldiđ Suomi.fi-viestâid kiävtun. Šleđgâhámásii kuoddâlemluámáttuv kevttim ij vaađâ Suomi.fi-viestâi kiävtun väldim, ige palvâlus lah tuáistáážân riehtiäššiulmuu kanslia kiävtust. Jis haalijd, te kiävtun väldim puáhtá karveđ já juátkiđ tubdâttâttâm táválávt.